面試必答題——自我介紹

眾所周知,見工面試第一條問題必定是自我介紹。可能你會問,CV上已經有我的全部資料,究竟說些甚麼才是恰當呢?短短一分鍾的自介真的這麼重要嗎?

不知大家有沒有聽過「Elevator Pitch (電梯簡報)」,即是假設有一天你在電梯裡遇到重要人物,你會如何利用短短幾十秒時間向他傳遞你的想法,以獲得他的青睞,從而有進一步合作機會。而自我介紹正正是你給HR的第一印象,你的談吐﹑組織能力﹑態度已經可以在短時間內略知一二,是一個機會展示自己。

剛才提及過,自介大概只有45秒到1分鐘時間,因此如何精簡內容而又具吸引力是極為重要,在此可以看看以下內容分佈:

1. 基本資料 -10s
.名字
.學歷
.工作年資

2. 分析職位 -20s
.是一份怎樣的工作
.需要甚麼技能

3. 解釋你如何適合這份工作 (refer to 2.) -30s
.歸納你的優點/性格/能力
.一句概括解釋
.例子 (十分重要!!!)

自我介紹不能太過空泛,必須有例子說明,HR才能了解你過往的工作經驗。而對於不同類型的candidate,內容方面又會有所調整,主要分為4類:Fresh graduate﹑3-5年工作經驗﹑行業資深員工﹑橫向型人才 (可以fit in大部份操作級職位的candidate,不限行業) 。

1. Fresh graduate
Fresh graduate大多不會有工作經驗﹑因此在part 3解釋自己如何適合這份工作時,就可以講一些過往在學校裡參加過的活動﹑part time工作﹑internship﹑exchange﹑個人興趣等怎樣與這份工作相關,向HR解釋大概的工作內容,亦不妨列舉一些可量化的例子加強說服力。

例:Fresh graduate應徵Event Marketing工作
你好,我叫XXX,可以叫我Mary,我喺YY大學讀Marketing,見到貴公司招聘Event Marketing就覺得好有興趣。我諗呢份工作主要都係負責籌備唔同嘅商業活動,諗一啲吸引嘅campaign,再落手落腳去執行。雖然我無任何全職工作經驗,但我曾經上過學系嘅莊。身為宣傅幹事,我負責諗各式各樣嘅宣傳活動吸引學會成員參與,又要同其他幹事合作,大家都係親力親為。我哋搞過最大型嘅event就係……(精簡內容:當中學習到的技能如何幫助你的工作) 另外,我都做過一年幾part time,喺會展做event helper,主要負責一啲場務工作,亦有做問卷調查員,平均每個月我都會參與兩次或以上嘅event,藉此我可以更深入了解到舉辦一個大型event嘅細節同後勤工作。

2. 3-5年工作經驗
如果你已經工作了3-5年,大概也是做過一至兩份工作,累積了一定程度與行業相關的經驗,比Fresh graduate自然有更多例子可以列舉讓HR更清楚你的本錢。如果你是轉行,可以嘗試從過往經驗與這份工作尋找共通點,雖然職業各有不同,但工作中學習到的待人接物﹑應變能力﹑創意頭腦等等都是寶貴的經驗。

例:轉行,應徵Digital Marketing Executive
你好,我叫XXX ,可以叫我Peter,我喺YY大學讀Management Science,總共做咗5年嘢。知道貴公司 (e.g. digital agency) 請緊Digital Marketing Executive,根據Job Description,我估你哋想搵一個熟悉Search engine (e.g. Google) 同 Social media (e.g. FB, IG) 操作及數據分析,並且要跟進客人嘅enquiry同digital marketing project喺過往5年中,Soft Skill方面我有2年時間都係做Sales同Customer Service,學識更多聆聽客人需要同溝通嘅技巧,一日內至少都要處理十幾個客人嘅查詢。而另外3年我係做Project Executive,負責跟進唔同類型嘅event project,由場地配置至聯絡客人 (每次event 約20-50 人參加 ,1個月5次左右),深深明白到細節嘅重要性。而喺Hard Skill方面,我讀嘅本科同數據關係密切,所以我對數字分析都好敏感,而且我空餘時上過一啲關於Google SEO/SEM 同FB ads short course!我好想可以藉住呢個機會轉去一個自己十分有興趣嘅行業,所以希望透過今次interview 互相了解更多!

轉行的情況在已經工作了幾年的candidate中也是常見的,累積了一些工作經驗,也認清了自己的興趣和方向。除了上述提及過的,我們也鼓勵candidate可以自修一下與新工作相關的資訊,可以是上course,簡單如google一下亦可,免得僱主問你的時候你其實認識不深,就會讓人質疑為甚麼你會有興趣轉行。如果你是非轉行,自介範例可以參考下面「行業資深員工」,內容分佈大致相同。

3. 行業資深員工
如果你已經做到資深的職級,稱得上是半個專家了,可以更有自信地分享你過往的工作﹑有甚麼成就等等,亦可以談及更多管理層面的經驗,這些亦是你比其他人優勝的地方。

例:應徵Manager
你好,我叫XXX,可以叫我Tom,我做過field A/Company A五年, field B/Company B十年 (最相關的),管理經驗共五 年 。知道貴公司而家請緊一個Manager嘅位置,依Job description 估計,貴公司發展方向應該係XXX (例如:希望增加東南亞區域生意) ,而呢個role 需要一個有XX 行業經驗的人,同時要team 及上傳下達其實我以往起XX 公司負責帶領30人,最後亦幫舊公司將product X推廣到東南亞各區 (包括越南﹑泰國2個地區) ,生意達7位數字,我亦在公司Y 負責跟進Y product 同服務嘅發展,曾經跟過一個project 改善咗生產流程,令生產速度快了20%。總括而言,初步我覺得我係適合呢個位置,所以想透過呢個interview 去互相了解多啲,睇下點樣可以將我嘅value 帶俾貴公司。

粗斜體的部分就是你整合所得的重點,而針對你提出的點,再用例子解釋,自然清晰又有說服力。

4. 橫向型人才
橫向型人才即是不需要特別技能的工作,較易上手,不限行業,流動性亦較高,如Sales﹑F&B﹑文員﹑CS等。由於工作多樣性,因應你工作的需要而舉出切合的例子便可。

例:應徵較為沉悶的文員工作
你好,我叫XXX,可以叫我Jackie,我喺Asso讀business。我諗呢份文員工作主要都係負責打字入文件,要熟練咁運用Microsoft Office同一啲基本電腦知識。我之前做過2年文員工作,每日大概花3個鐘打完一日嘅文件,無論係英文定中文嘅文件我都可以打得好快,我亦都好細心,甚少出錯;其餘時間用Excel入data,每日至少入200條data,基本嘅equation我都識運用,而我多數係幫sales manager打sales report,整理好再做圖表分析。我個人比較文靜,可以長時間專注喺一件事,例如係睇書,一睇我就可以睇兩三個鐘都唔會覺得攰。好似文員呢啲需要專注度高嘅工作,我好有信心可以做得好。

其實要準備一篇好的自我介紹並不困難,重要的是你有沒有對準目標,與工作有沒有關聯性,表達出因為你的能力切合這份工作的需要,僱主非請你不可。當然,自介只是入門讓面試官對你有較好的印象,小編陸續也會出不同面試問題的教學文,各位敬請留意!

除了上文提及的部分,小編亦收集了一些關於自介的常見問題,一一解答大家!

1. 應否提及CV上有的資料?
只需精簡地說一些基本資料,切勿「照稿讀」,CV內容頂多佔自介內容三成。

2. 自我介紹時的態度應該進取一點還是謙虛一點?
謙虛而有自信,不要低估自己也不要過份吹噓自己,如實介紹就好。

3. 需要解釋自己為何對這份工作有興趣嗎?
可簡單解釋,例如是:我在大學時期修讀了這一科,因此對這個行業亦很有興趣。不要太過長篇或煽情,始終說明你的能力才是重點。

4. 我應該一次過說幾點還是一個重點深入解釋?
正如上文所說,有例子支持才夠具體﹑言之有物。時間所限,說一至兩個重點就好。自介內容其實也是一個框框讓HR可以有方向地問你問題,因此不用擔心之後沒有機會補充,HR會挑選他有興趣加深了解的部分來問問題。

5.  面試官未叫停我是不是應該繼續說下去?
自介大概一分鐘時間,把重點說完停下即可,讓面試官問你其他問題。

Back

Drop CV now

Please drag your CV file here
Send CV