求職者擁有穩定嘅工作經驗、每一份工作都無縫交接就梗係令一眾 HR 同 headhunt 趨之若鶩啦，但查實唔少求職者 CV 上都有空白期，小至半年 – 1 年，大至 3 – 4 年或以上。通常呢類求職者都好怕被僱主或 HR 問到「口啞啞」。呢個時候到底應該點解答？有空白期對於最後有冇 offer 影響係咪真係咁大？
1. Take a break 唔緊要，最緊要係你準備好投入工作
其實如果你嘅空白期原因主要係想休息下、去旅行放鬆心情又或者抽時間陪下屋企人，不妨向僱主坦白，喺香港呢個咁大壓力嘅地方長年累月咁工作，想咩都唔理、祼辭休息下絕對唔難理解，求職者可以話畀僱主聽喺休息期間諗通左啲咩，有咩新打算、新計劃，最緊要係話比僱主聽你已經身心都準備好再次投入工作。
2. Working holiday 加分減分視乎你點演繹
有啲人嘅空白期係去咗 1 – 2 年嘅 Working holiday。曾經遇過有啲求職者話自己去完覺得冇咩得著，因為大部份同事都係華人，生活環境加上周遭嘅人都同喺香港冇乜分別。雇主聽到真係會覺得你嗰段時間係完全浪費咗。其實可以集中講下 working holiday 有咩得著，例如用得外語多，英文/國語進步咗自然可以加分，但如果你覺得語文能力冇變好到，可以講下其他重點，例如變得獨立啲，解難同辦事能力高咗，又或者靈活變通左，都可以係獨自喺外地生活嘅重大得着。
3. 空白期做 part-time 為主 / 創業通通都要寫
如果你空白期間唔想求其揾份長工, 但又要唯生所以主力做兼職，而每一份兼職都有工作證明，其實都係好寶貴嘅經驗，絕對應該寫埋落 CV ，比起唔寫點都好啲，唔會畀人感覺你段空白期係解釋唔到。如果係自己創業的話，就有更多嘢可以講。創業過程、苦與樂同體會絕對唔係個個打工仔都可以學到嘅寶貴經驗。
記住面試時最重要係表現自己，唔好太集中喺為空白期解畫。求職者要重申對公司同職位嘅興趣，引導面試官將注意力放番喺你嘅工作能力、經驗同技巧等，方為上策。
—————————————————————————–
即時追蹤 Facebook ID: Six People Map – 6PM 深入了解各類求職及招聘資訊，無論揾工定揾人返工都可以幫到你，歡迎僱主及求職者隨時私訊或電郵至info@sixpeoplemap.com 與我們聯絡。